მიწა და უძრავი ქონება

პროექტის მოკლე აღწერა:

“საქართველოს რკინიგზის” ტექნიკური და ფინანსური მდგომარეობის გაუმჯობესების, ასევე მენეჯმენტის ეფექტიანობის უზრუნველყოფის მიზნით ორგანიზაციაში მიმდინარეობს რესტრუქტურიზაციის პროცესი, რომლის ერთ-ერთი მიმართულება ითვალისწინებს არაძირითადი საქმიანობის საწარმოთა და ქონების გასხვისებას პრივატიზაციის გზით.

ორგანიზაციის მფლობელობაში არსებული მიწისა და უძრავი ქონების საჯარო რეესტრში პირველადი რეგისტრაციისა და საპრივატიზებოდ მომზადების მიზნით “საქართველოს რკინიგზამ” გააფორმა კონტრაქტი მიწის მესაკუთრეთა უფლებების დაცვის ასოციაციასთან, რომლის საფუძველზედაც ხორციელდება საკუთრების უფლების აღიარებისათვის საჭირო სამუშაოები.

პროექტის ფარგლებში რკინიგზის 480-კილომეტრიან მარშრუტზე მიმდინარეობს “საქართველოს რკინიგზის” მფლობელობაში არსებული მიწის (უძრავი ქონების) ტოპო-გეოდეზიური და საკადასტრო მასალების მომზადება და მონაცემების კამერალური დამუშავება, აგეგმილ გრაფიკულ მონაცემებზე გასხვისების ზოლის დატანა რკინიგზის ფუნქციონირებისათვის აუცილებელი ყველა ობიექტის გათვალისწინებით; რკინიგზის მაგისტრალიდან მოშორებით არსებული ობიექტების სასაზღვრო კონტურების დადგენა, საკადასტრო აგეგმვა და დაზუსტებული ნახაზების მომზადება; მაგისტრალის გასწვრივ მდებარე უძრავი ქონების საზღვრების დადგენა ადგილობრივი თვითმმართველობის ორგანოებთან შეთანხმებით; გასხვისების ზოლში მოხვედრილი კერძო საკუთრებაში არსებული მიწის ნაკვეთების იდენტიფიცირება და მათი მფლობელების შესახებ ინფორმაციის მოძიება.

პროექტის ფარგლებში ასევე ხორციელდება ”საქართველოს რკინიგზის” კუთვნილი შენობა-ნაგებობების ტექნიკური პასპორტების მომზადება, რაც გულისხმობს მაღალი სიზუსტის საკადასტრო-აგეგმვითი სამუშაოების შესრულებას, შენობების ზუსტი ფართობის დადგენას და გეგმების შედგენას.

აგეგმვითი სამუშაოები სრულდება საქართველოს სახელმწიფო კოორდინატთა სისტემასა და პროექციაში. მონაცემების დამუშავებისათვის გამოიყენება თანამედროვე კომპიუტერული პროგრამული უზრუნველყოფის პაკეტი (ArcGIS).

საკადასტრო მონაცემების დამუშავების შემდეგ ხორციელდება ”საქართველოს რკინიგზის” კუთვნილი ობიექტების საჯარო რეესტრში რეგისტრაცია. შესრულებული სამუშაოების შედეგად დამკვეთს წარედგინება ამონაწერი საჯარო რეესტრიდან ყველა რეგისტრირებულ ობიექტზე, ასევე საკადასტრო რუკის როგორც ნაბეჭედი, ასევე ციფრული ვერსია, რეგისტრირებული ობიექტების მონაცემთა ბაზა და მონაცემები გასხვისების ზოლში მოხვედრილ კერძო საკუთრებაში არსებულ ნაკვეთებზე.

პროექტით გათვალისწინებული სამუშაოები “საქართველოს რკინიგზის” მფლობელობაში არსებული უძრავი ქონების პრივატიზების აუცილებელი წინაპირობაა.